Zirudèla.
Se al Nadèl l é divêrs dala Pâscua
e la Pâscua la n é brîṡa al Nadèl
ai ò pinsè ch'an séppa brîṡa mèl,
s av mand un caratén d augûri
cånter sti ténp sänper “più duri”:
Lé al guêren a i stà na pió fâta téppa
ch'la vrêv dèrs da intànnder che i turtlén
i séppn ala pèra con al brôd ed tréppa.
Ónnica, ch'as avanza e ûltma cunsulaziån
l é sperèr ed fèr prèst däl bôni eleziån.
Òcio però, an fèrv incantèr
da chi la sô scrâna an vrêv mâi mulèr.
Ch'an fèdi i cenâchi, al savî méi che mé
che Lu-là par la tèsta l à na curåṅna da Rà.
E alåura con chèlma mo con deziṡiån
par dscavères dai pî cavalîr e maramàn
andän a vutèr chi vôl intîra l'Itâglia
e che da la sô båcca non esca żavaglia
e che mâi manchi al rispèt par la Costituziån,
acsé gióssta e acsé bèla
tòc e dâi la zirudèla
Aldo Jani
Nessun commento:
Posta un commento